French-Azerbaijani University - UFAZ-ın tələbələri Fransanın Kann şəhərində keçirilən ActInSpace Hakatonunun Beynəlxalq Finalının qalibi seçilib !

French-Azerbaijani University - UFAZ-ın tələbələri fevralın 14-də Fransanın Kann şəhərində keçirilən ActInSpace Hakatonunun Beynəlxalq Finalının müsabiqəsinin qalibi seçilib !

2014-cü ildən bəri Milli Araşdırmalar Mərkəzi (CNES) tərəfindən yaradılan və dəstəklənən Hakaton iki ildən bir keçirilir. Bütün istiqamətlərdən iştirakçılar üçün açıq olan ActInSpace, komandalara Milli Araşdırmalar Mərkəzi və tərəfdaşları tərəfindən patentləşdirilmiş kosmos məlumatları və texnologiyaları əsasında sınaqlar təklif etməklə, sahibkarlıq ruhunu inkişaf etdirmək və mütəxəssislər ilə vətəndaşlar arasında əlaqələr yaratmağı hədəfləyir.

Eliminasiya mərhələsində, dünyanın hər yerindən komandalar 24 saat ərzində bir araya gələrək, biznes kouçları və texniki ekspertləri ilə gündəlik həyat məsələləri üzərində işləmək, fəza məlumatlarına əsaslanaraq gələcəyin məhsul və xidmətlərini təsəvvür və tərtib etmək üçün birlikdə işləyirlər.

Bu il Kann şəhərindəki Konqres və Festivallar Sarayında keçirilən final mərhələsinə ötən ilin noyabrında vəsiqə qazanan UFAZ komandası xüsusən İtaliya, Slovakiya, Ekvador və Latviya komandaları ilə qarşılaşıb.

Onların startap layihəsi beynəlxalq texnologiya ekspertlərindən ibarət münsiflər heyəti tərəfindən seçilib.

Qalib komandanı və UFAZ-ı təbrik edirik !